最近好少見糖兄妹孖公仔出場，原來糖妹最近多咗個「糖姐」Takki，有糖妹嘅地方又點會少得令人垂涎三尺嘅甜品呢？臨近聖誕，糖妹仲話要同呢位糖姐齊齊勁擦所有聖誕蛋糕，名副其實做為食甜姐兒。
記者：歐陽曉思 攝影：劉永發、陳盛臣
服裝提供：Nice Claup
新晉甜品達人 無甜不歡
糖妹（黃山怡）一向樣子甜美，向來迷倒不少男粉絲，被封為「宅男女神」真的不為過，拍攝當天她十分Casual地背住大背包走進來，笑容燦爛到殺死人，拍攝時更表情多多，從不重複，心想她天生要吃這行飯，問她糖兄去向，糖妹笑笑口：「佢好快要結婚，同埋佢家主要喺幕後作歌，好彩家有Takki返嚟公司，咁我先會無咁悶。」Takki（王若琪）是糖妹的同門師妹，被糖妹喚作「糖姐」，二人所走的路線不同，一個可愛一個型格，原來她們早已在歌唱比賽中認識，之後成為好友，由於她倆都是朱古力迷，所以每年聖誕更會相約食聖誕蛋糕。
糖妹經常在Blog分享食經，更自爆從不挑食，只要是甜品，無論中、西、泰都是她所愛，早前主持《甜姐兒》令她嚐盡各地甜品，變成甜品達人，「其實我好鍾意食甜品，所有甜品都啱，惟獨唔食榴槤，聞到都怕怕，我覺得甜品就正正代表快樂，無論係聖誕或者係生日，都總會食甜品，甜品絕對能為生活增加色彩！」
問及糖妹最愛的甜品，她坦言特別愛朱古力蛋糕，「但我討厭死甜，例如Cupcake上面啲糖霜，我真係怕怕！其實以前好鍾意整甜品㗎，中學時仲經常整㖭！」咁有無整畀男朋友食先？「有㗎！呢啲嘢點都要做嘅。」糖妹隨即做個超級甜美笑容，我見到都覺得Sweet爆！「我第一個整嘅就係藍莓芝士蛋糕，試過聖誕節整朱古力慕絲蛋糕，點知焗到跳Fuse，搞到我只可以攞個半熟蛋糕畀男友食，好彩佢無嫌棄啫！」
不過見她經常大啖食甜品，為甚麼糖妹會唔肥？糖妹話明自己貴精不貴多，每次出發吃甜品前，都必上網找尋值得投放卡路里的甜品店，以免浪費Quota。而Takki也是無甜不歡，最愛心太軟，而自己也只會弄心太軟，不過自言與外面的相差甚遠！而她們兩個真的名副其實是甜品癡，當她們看到一桌子甜品的時候，兩個頓時瘋狂大叫，所以絕不能小看甜品對女士的魔力！
Carousel Fine Cake and Pastries
電話：2895 0299
地址：銅鑼灣告士打道280號世貿中心P421 B號舖
＊蛋糕須兩日前預訂
天使迎白色聖誕
說到聖誕大餐，除了火雞、薑餅人外，聖誕蛋糕也是不可或缺的美食。BreadTalk今年創作了五款以天使為主題的聖誕蛋糕。為滿足愛蛋糕人士的味蕾，餅店特別推出人見人愛的許願樹，其表面抹上幼滑的白朱古力慕絲，上面鋪滿藍莓、覆盆子以及新加坡龍眼等，吃起來鮮甜又健康。至於栗子迷，絕不能錯過栗子聖誕園，蛋糕以栗子奶油及焦糖慕絲，加入杏仁碎和可可碎製成，散發濃郁香氣，餅師為增添節日色彩，用上士多啤梨、啤梨以及牛奶朱古力裝飾蛋糕面，被譽為「不可不試的栗子忌廉蛋糕」。小記則推薦大家吃紅卜卜的天使禮物，粉紅色的禮物盒包保令女士一見傾心，在視覺、感覺及味覺上都帶給你煥然一新的體驗。
BreadTalk
查詢：2907 0002
＊蛋糕須兩日前預訂