傳統英超聖誕新年地獄賽程提早由今晚開始，重點推介，兵工廠大炒雷丁後再獲十年難得一遇嘅拆禮物日免戰嘅大喜消息刺激，天賜今夜冧多個客W拔地下「根」（韋根）。
玩一人一票，令無記極忌諱嘅《天與地》喺原本塘水滾塘魚嘅頒獎禮奪得最佳劇集大獎；佢哋亦乘勢喺新年起深宵重播，益我哋呢類黃金時間從來睇唔到電視劇集嘅夜班一族；呢個年年業績大賺數億元卻爭議不絕嘅大機構肯稍改保守作風，某程度可能因為正有外來對手挑戰，不得不對觀眾眼睛好一點。
阿仙奴今季好大機會延續第8季無冠，對呢間06年搬入新球場後幾乎場場坐滿6萬人以上球迷嘅倫敦大會，不滿嘅聲音年年有，今季嚟得特別早。雲格自恃年年起碼領兵入到前4兼必入歐聯16強，你又吹佢唔脹。或者小弟也是慣性收視，好怕變做車仔擁躉咁，年年換領隊；或者利迷，見班波換極血都係差勁，年年使數千萬鎊換血無效被紅魔躉訕笑咁難受。求變求盃，唔止傳媒，連路人甲也識鬧識批評，但季初重擊係桑治被巴塞撬即心動非領隊責任，當然信錯「藥煲」戴亞比可以完全康復係敗筆，令防線失有力屏障今季狂失波；但一個揸數咁叻嘅人，難似曼聯費Sir兵厚到咁，早前鬥雷丁臨場變陣止瀉咁精采；老江湖各有殺着，不過雲格選擇呢條路，未必係普羅球迷可接受。
除非終有一季踢唔到歐聯，否則要一個63歲、喺世界球壇享負盛名嘅老人家全盤推翻自己治軍理念，難矣！但欣賞佢今季喺陣容上已不斷為球會改變，上次肯用禾仔打中鋒，再好少有咁高調同5小虎喺鏡頭面前高薪續長約。對韋根前更大好消息係，個個領隊唔願11天打4場嘅聖誕新年快車賽程，又俾阿仙奴借地鐵罷工過到骨，唔使下周三迎戰韋斯咸；今夜作客鬥韋根，可無保留拼盡了。基奧特仲先做後備？
對手韋根近期受傷兵困擾，不復早前勇銳，近4戰1和3負，中場好波之人賓屈臣重創長唞，隊長中堅卡達維亦傷患纏身，快車期場場硬仗由今夜開始；阿仙奴上仗嘗試多用兩翼側擊簡簡單單斬中入禁區，效果又幾好，呢招對成日甩轆嘅韋根「亞洲神龍」艾哈比斯，係一大考驗，今晚唔心多，3注全攻阿仙奴過一個天天要上班嘅末日後聖誕，拆禮物日再傾波經。文：蘋果波神
（下次見報日期：26/12）