內地敢言嘅深圳《南方都市報》，早前頒咗個城市保育獎畀「守護龍尾大聯盟」，擺明想同開發龍尾嘅狼振英政府對着幹，《南都》最近又頒發「公民獎」畀定期發表政府民望嘅港大民意研究計劃鍾庭耀，分明係同西環、狼英過唔去。
唔擔心人身安全
《南都》記者問鍾庭耀，擔唔擔心做民調會惹來血光之災，鍾庭耀話，屋企人只會擔心佢係咪開心，又歡迎有機構就佢嘅誠信進行民調：「香港是法治社會，我對人身安全從來沒擔心過，反而有時在街上會有人過來握手，誇獎幾句，合影甚麼的都有。」
鍾庭耀係中聯辦嘅眼中釘，兩年前一個恒常嘅香港人身份認同調查，發現港人對中國人身份認同創10年新低，激到阿爺紮紮跳，批評有人玩「滴血認親鬧劇」。鍾庭耀話，連內地報章都頒獎畀佢，證明香港同內地都應該一齊搞民調，齊齊發展公民社會。
CCTVB玩普選視帝，港大民研有冇諗過接呢個job做？鍾庭耀話，只要係公眾關注、唔受委託機構影響嘅民調先至會做，仲話統計結果唔一定係最後賽果，分明係寸緊CCTVB隨時逆民意而行啦。