英基學校近年受一籮籮負面新聞困擾，如有副校長疑因壓力自殺、高層被挖角、外籍教師教中文教到亂晒龍，可能擔心形象插水，英基惟有諗計救亡，今個月搵番英基出品嘅「千億新抱」徐子淇做生招牌，吹捧讀英基型英帥靚正，擦番靚英基個招牌。
英基今個月本校友通訊，介紹畢業生家陣有幾巴閉，搵嚟2001年畢業嘅校友徐子淇做封面人物。徐子淇單係嫁入恒基李家，四叔已經畀咗四億禮金，之後子淇生咗兩女一子，個個都價值連城，子淇仲話要繼續生，呢個舊生，仲唔係英基最傑出校友？
囡囡想做動物園管理員
校友通訊訪問已做媽媽嘅子淇，佢話父母最緊要知道子女專長，加以發揮，教佢哋對做緊嘅事有團火，唔係齋撈一份高薪厚職就算，就好似佢個4歲女咁，話將來想做動物園管理員喎！子淇話冇所謂，女大女世界。「上晒岸」嘅子淇當然講得輕鬆啦，查實佢個女唔使做都冇咩問題，要四叔開個動物園綽綽有餘啦。
既然係校友通訊，唔少得子淇做女時候嘅學生照，由初中到高中真係女大十八變，那些年肥嘟嘟，變到面容清秀，仲有佢同出世冇耐嘅囝囝Triston嘅母子合照，仲一次過出咗兩張囝囝嘅相，不過唔見兩個女，唔通偏心？
子淇1995年入讀英基香港仔南島中學，2001年畢業。佢話自己讀書時唔係醒字派，要睇好多次先至明白本書講乜，要相當努力，所以成績好優異。不過佢話相當後悔喺英基預科時冇讀文科，話自己去到英國讀大學時，先知原來自己真正興趣係文學。
千億新抱嫁咗入豪門，話家下日日好似做番學生咁，每日對住仔女，要學習點做個好媽媽，做個盡責嘅人。佢又大嘆香港年輕人生活太迫人，窒礙創意同想像力，叫香港父母要畀小朋友多啲空間，畀佢哋發掘新事物同玩樂。對生活逼人、做樓奴嘅一般香港人而言，呢番話，確係發人深省。
mailto:[email protected]