傳統名校華仁書院幾年前決定籌1億元搞小班教學，但籌咗幾年仍未達標，港華校友李克勤請老友譚校長譚詠麟，幫手搞籌款音樂會，並藉演唱會歡送服務咗華仁近40年嘅港華校長譚兆炳，門票由100蚊至2,500蚊，全院滿座，一take過籌幾百萬，據說籌款已達標，未來十年，港、九華仁初中嘅中、英、數三科，都會小班教學，真係要多謝譚校長。
音樂會今晚喺會展舉行，華仁仔管弦樂團負責演奏，校友兼前特首辦主任梁卓偉做客串指揮。兩位譚校長仲會同台合唱，全場舊生仲會合唱羅大佑名曲《皇后大道東》，即係港華位處嘅嗰條街。
離任在即，譚兆炳暗批教育局局長吳得掂唔識得同學界溝通，希望教育局將來有啲咩新猷，諮詢唔該做好啲。佢又話九華已搵到新校長，但係港華就仲未搵到，要再登報請人。