現年58歲嘅成龍自導自演嘅電影《十二生肖》前日喺香港上映，佢喺微博度公告天下，話經過幾個月被迫着靚靚做宣傳，現在可以有餐好飯食嘞。同日仲有另外五部戲上，包括《吸血新世紀4：破曉傳奇下集》（The Twilight Saga：The Breaking Dawn Part 2）、湯告魯斯套《烈探狙擊》 （Jack Reacher）同3D卡通《無敵破壞王》（Wreck-It Ralph）等。
僅贏靚佬湯
大家最關心當然係票房，跑出嘅係《吸血新世紀4》，第一日已經有215萬元票房，第二位估唔到係套卡通片《破壞王》有170萬元。無錯，成龍套新片輸咗畀套卡通片，開畫只得53萬元，大比數被拋離成為第三位，僅僅贏得45萬票房排第四位嘅靚佬湯少少。不過計下數成龍都唔係贏得好馨香，事關《十二生肖》未上畫前就曾經用團購，以88元兩張飛嚟促銷，條數都計埋落開畫票房度，仲要《十二生肖》第一日播咗176場，多過靚佬湯嘅149場，認真計落靚佬湯每場收入仲贏番少少。
撰文：馮仁昭