《樂》趁英超聖誕快車仲未開始，唔少球會都趁呢個空檔搞聖誕party，做定節先。
曼聯就喺周三晚舉行球會年度晚宴，球員都着晒西裝出席，其中基斯史摩寧、尼克包維同莊尼伊雲斯等小將都有帶埋女伴嚟，反而傑斯、里奧費迪南同朗尼呢啲老大哥就單拖赴會。因為費格遜呢個周中去咗美國講talk，所以佢老人家就趕唔到返嚟主持大局。
同一晚，阿仙奴亦有聖誕party，球員衣着都casual啲。除咗潮人奴、即係謝雲奴同沙格拿個look幾搶鏡之外，焦點就當然喺班WAGs身上。禾確特帶咗佢青梅竹馬嘅女友美蓮妮嚟，真係樣靚得嚟又大方，一個都殺晒隔籬曼聯嗰班。韋舒亞就同女友羅倫嚟，羅倫睇落身材都好fit，唔似生完仔；而華美倫及施捷斯尼等嘅另一半，亦都好養眼。