無綫近年因為版權合約問題，搞到好多歌星唔上得節目，節目冇厘睇頭，呢個死症始終未解決，聽聞年底嘅倒數節目兼跨年騷會由旅遊發展局搞，由無綫製作，不過卡士欠奉，聽聞只係得胡杏兒、吳卓羲、梁烈唯同王君馨等做嘉賓唱歌，反而nowTV就乘機靜靜起革命。
播埋江蘇跨年
馮仁昭最近收到風，一直同內地衛視有聯播嘅nowTV，今年嘅跨年晚會節目唔少嘢，因為同佢哋聯播嘅湖南衛視已經落實請到來自五湖四海嘅巨星，包括韓國人氣爆燈嘅張根碩、男子組合Super Junior，仲有陳奕迅同天后王菲；台灣代表就有蕭敬騰；內地歌星就有李宇春、周筆暢同張靚穎，陣容非常強大。
nowTV跟住仲會播埋江蘇衛視嘅跨年晚會，呢邊都唔弱，陣容有周杰倫、羅志祥、蕭亞軒、黃小琥、劉若英、林憶蓮，韓國歌手則有金賢重、Boyfriend同SJM做代表，相比無綫嘅歌星本地化兼本台化，nowTV呢邊真係吸引好多喎！
撰文：馮仁昭
