近期新能源行業出現好多利好政策，究竟會唔會令光伏、風電業起死回生？如果淨係講風電，晉佳覺得新政策長遠幫助唔大，不過，風電業本身已經夠衰，個別相關股份盈利應該今年見底，目前估值低殘，只要環境稍為好轉，股價已經有條件回升，現價可分段吸納。
近排刺激風電股反彈嘅消息，包括核准16省區新增風電項目，同財政部預撥今年可再生能源電價附加補助86億元人民幣。新核准項目主要分佈山西、浙江、福建、山東、湖北同湖南等中東部，當地冇電網接入問題，新增產能可以順利上網，唔會出現棄電嘅情況。
內地風電業面對最大嘅問題，就係限電。風電上網唔穩定，國家電網亦唔願配合增加風電電網嘅投資，就連阿爺都管唔到，令到問題至今仍未解決，搞到近年風電企業部份新增項目，投入營運後都要被迫棄電，令項目使用率嚴重降低，尤其內蒙、甘肅等地係重災區，同時企業又要為新增產能找數，搞到負債纍纍。
華能新能源快破頸線
之前阿爺都要求電網接收更多風電，否則要罰款，但國家電網一於少理，拖慢嚟做，風電企業繼續大幅度棄電，其中內蒙棄電比例高達五成，東南面情況好啲，未被限電問題拖累。
近年阿爺勒令唔批新增風電項目，直至最近批出部份唔受限電問題影響嘅地方項目，對風電股雖有好處，但長遠幫補唔算大。不過，棄電問題已經去到最壞，之後會慢慢紓緩，加上風電企業見過鬼怕黑，寧願去冇限電問題嘅地方同海外擴充，中央亦會嚴控企業亂投資，展望未來收入會繼續升，預計可以抵銷財務成本、折舊同維修費嘅升幅，嚟緊盈利應該進入升軌。
香港上市嘅風電股有龍源電力（916）、華能新能源（958）同大唐新能源（1798），其中華能新能源造咗圓底兼大成交醞釀破頸線，後市有運行，可先買第一注。嚟緊下周一只要冇世界末日，晉佳再分析埋幾隻風電股。
晉佳
本欄逢周一、三及五刊出