今日係瑪雅人預言嘅所謂世界末日，部份信徒為此盲搶朱古力、淨水丸，更甚者走去學求生技能。唐牛認為既然係末日，又點會畀渺小嘅人類有生存機會呢？無論如何，希望戰友們能夠與家人平安過渡呢個非一般冬至。
人類千方百計應付末日，股市求生意識亦非常勁，恒指噚日跌逾百點後急彈，成功倒升收場。唐牛10月底推介嘅光伏股卡姆丹克（712），不足兩個月已累升四成。國務院最近確立光伏業健康發展措施，得到阿爺強力支援，卡姆丹克估值絕對有上調空間，最重要係早排已宣佈批股，不利因素消除，以近日強勁走勢，相信批新股已落入強者手中。事實上，集團今年恢復盈利能力，首三季實賺7302萬人仔，喺國策配合下，今季以至明年盈利只會更強。
卡姆丹克已突破圓底頸線阻力，下一個衝擊目標，將會係年初1.50至1.70元嘅蟹貨區，中長線睇兩蚊樓上，每次回落皆為吸納良機，明年倍升股名單，絕對有佢份。
唐牛