有人話，畢彼特嘅香水廣告好型，花旗就認為，相反理論主義先至係最型！該行噚日出咗份報告，用"cool"嚟形容相反理論主義者，仲話唔少信徒喺金融海嘯期間贏咗一大筆，實在羨煞旁人。
報告提出，舊年跌到阿媽都唔認得嘅銀行股如美銀、高盛同法巴，今年嚟個大翻身，成功扑中嘅相反理論主義者，肥過肥仔水。
美言一輪之後，花旗就話呢個理論只適用於轉角市，其餘時間都係跑輸大市。好似明年咁，花旗預期唔會再有翻身股出現，仲勸嗰班相反理論主義者，如果準備重錘買入今年勁插水嘅能源同資源股，就唔好諗住揸到出年年尾，2月有得賺就快啲沽貨獲利喎。講到尾，投資者信花旗定相反理論，自己諗啦。