2012年12月21日，相傳係世界末日，喺人心大亂之際，爽仔想講一個香港仔奮鬥成為「大話英帝國」猛將嘅勵志故事。
話說55年前，有個哨牙老竇生咗個哨牙仔，佢叫做劉江華，眼細但睇通世事，有着數都逃唔過佢嘅法眼；佢原本為人師表，但小小嘅教室點困住佢嘅超班口材？江華仔喺80年代從政，做沙田乙明邨區議員，當時係民主黨前身嘅港同盟成員。
到咗1991年，「政壇劉華」同阻頭阻勢嘅黨友起衝突，佢受處分時唔忿氣，索性退黨保平安，創立公民力量自己話晒事。
月薪8萬變近20萬
1997年港英年代終結，劉江華知道搞民主冇發達，1998年加入最有前途嘅民建聯，贏得「政治變色龍」嘅美譽，之後每屆立法會都連任，2008年更加成為全港票王，帶埋同黨嘅陳克勤入局，同時仲係行政會議成員兼區議員，威過真正劉華。
2012年係大話英元年，劉江華以「香港要贏」口號出選立法會落敗，膚淺嘅網民以為佢唔夠票墮馬，成立「全港各界熱烈慶祝劉江華落選委員會」，帶埋花生同香檳去佢辦事處唱「熱烈地彈琴熱烈地唱」，懵然不覺前所未有嘅風暴已經殺到嚟。
狼英一向同民意作對，政府噚日宣佈劉江華入籍「大話英帝國」，盛讚佢係政治人材，今日末日開始做政制及內地事務局副局長。劉江華唔撈月薪8萬嘅立法會議員，揀咗月薪近20萬嘅副局長，做四年半，納稅人就要向佢進貢過千萬公帑，遲啲升做局長同司長會搵得更多。所以話，輸到雙失都變贏開巷，只有劉江華！
劉江華已經辭去咗沙田區議員同埋民建聯副主席嘅職位，但係仍然保留黨員身份，民建聯主席譚耀宗盛讚劉江華好有貢獻，形容係「割愛」。網民聽到之後都覺得好感動，呼籲大家元旦出嚟遊行，要求民建聯回收劉江華作私人用途，咪出嚟獻世。
吳爽
