國泰航空（293）前大公關莊偉茵今年9月走去中電（002）幫嘉道理同政府講數，佢位副手楊志剛（CK）最近亦有新動向，明年1月4號就會去中大新聞傳播學院全職教書，應該教企業傳訊同公關科目，啱晒佢合尺。
CK喺國泰做咗兩年幾，之前喺科大、九鐵、貿發局等機構做過，可謂公關老手，不過就比較低調，佢文質彬彬，講說話陰聲細氣，都幾似教書先生。佢亦好鍾意教書，喺中大兼職教公關課程已經七、八年，每星期教一晚，明年就以專業顧問身份轉為全職教書。
聽聞CK早幾個月已經遞信，10月中開始冇返工，清埋喺國泰嘅假期，明年1月3號正式last day，4號佢就係中大全職講師喇。