冇咗個世冠盃，都仲有英聯盃可以爭吓。車路士橫跨半個地球由日本空手而回，班球員仲未適應好時差，就要喺周三出戰英聯盃8強賽事，好彩總算有驚無險過關；作客英冠列斯聯半場落後，以5:1反勝對手。雖然今屆賽事，各大頂級強隊都已經出局，但車仔4強對住算係最難骾嘅史雲斯，領隊賓尼迪斯要帶領球隊贏第一個盃，都唔係十拿九穩。
英聯盃8強炒列斯聯5:1
前鋒比治奧為主隊喺37分鐘先開紀錄，車路士雖然有疲態，但喺下半場仍然有力上演大反擊，桑馬達、伊雲洛域、域陀摩西斯、夏薩特同埋費蘭度托利斯各建一功下，反勝5:1，晉級4強。
賓尼迪斯喺賽後話：「我哋喺上半場嘅表現好好，到咗下半場就更加無懈可擊。由日本返嚟之後，成班波都好攰，不過大家依然有貨交；我唔應該只係個別讚賞某一兩位球員，因為全部都好出色。」
今屆英聯賽去到4強，只係剩番車路士一支頂級勁旅，理所當然被視為奪標大熱。賓帥喺一片車仔球迷喝倒采聲之下上台，要贏人心梗要贏錦標；錯過咗世冠盃之後，英聯盃就係好機會，佢話：「對任何領隊嚟講，贏冠軍都係最重要嘅事情，不過我哋要先踢好4強，到時先諗有冇機會捧盃。」
總算賓尼迪斯冇因一場勝仗沖昏頭腦，經過抽籤之後車仔喺4強同史雲斯交手，而阿士東維拉就同黑馬巴拉福特對壘。對車仔嚟講，4強要對史雲斯唔算係上籤，話晒後者都曾經喺16強將利物浦淘汰，如果又踢番世冠盃決賽輸畀哥連泰斯場波嘅水準，咁就相當危險喇。