吳彥祖早前宣佈愛妻Lisa S.懷孕三個月，現時Lisa S.的身形每天向橫發展，特別是胸和臀部都日漸脹大，令一向身形瘦削的Lisa S.大感不滿，不過吳彥祖就大唱反調，還自爆喜歡多肉一點，但現時他齋睇唔掂得愛妻，言下之意即要開始禁慾之旅。
由吳彥祖、劉燁及張震等主演的《王的盛宴》前晚在銅鑼灣舉行首映禮，吳彥祖的太太Lisa S.有孕在身未有到場，而他亦坦言愛妻不舒服，加上電影有血腥鏡頭會令她嘔吐大作。吳彥祖笑指現時太太只是進食時才沒有嘔，更大爆她身形暴脹不少：「佢家身形我見都未見過，以前好瘦，家pat pat又大，胸又大，只可以睇，唔可以掂，佢唔鍾意，我就鍾意多啲肉，但佢proud of個過程，但我唔希望佢瘦番，我有朋友都係咁，肥好多，但唔減住生多個。」他否認想追仔，只是想追多個陪女兒，不想女兒孤獨成長，但他又擔心愛女在11、12歲就被追求，反而生個弟弟就可保護家姐。相信吳彥祖不用擔心愛女，因為劉燁和他私下訂了婚約，兩人更勾手指尾成為親家。
惠英紅疑撐王維基
特意捧場的惠英紅透露下月會拍劇，但否認是拍無綫劇，問到是否幫王維基？她故作神秘說：「唔知呢，我冇講過任何嘢，本身同TVB都冇約，有成三年冇喺香港拍劇，自從阿哥件事後，心態唔同咗，想留番多啲時間喺香港。」現時感情空白的她直言不時公開徵求男友，但未有心水：「我唔使嫁有錢嘅，我食得少，衫又有sponsor，不過都要睇緣份。」
張震對於《一代宗師》成為第63屆柏林影展開幕電影，他盼到場支持，又謂未清楚《一》片的上映日期，現時仍要配音：「應該不用補拍，都拍了三年，不是第一次和王家衛合作，已經習慣，《2046》拍了五年，他是慢工出細貨，值得的。」
採訪：溫敏芝
攝影：陳志嵐
