到中環某大廈開會，等時聽到一位貌似80後嘅快遞員同管理員講：「梁振英講嘢真係醒，在立法會面對長毛、李卓人等等兇佢嘅議員，幾淡定呀，啲議員吹佢唔脹，換轉係唐英年呀，一定在立法會講到面紅耳熱，嘴巴打結，亂晒大籠！」管理員似係50後，回答話：「鬼咩！唐英年冇鬼用㗎，講大話都唔識，人哋一問佢就穿煲！」
左丁山聽咗，唔知好嬲定好笑，梁振英至今民望仍然未跌至45分以下，仍然有人支持（唔信就聽吓電台烽煙節目，唔少中年基層男女打電話上去罵主持人，挺梁不遺餘力），相信係以基層市民最多，以前兩間大學嘅民意調查顯示，低學歷、低收入、年紀較高嘅市民就似係CY擁躉，只要佢堅持派糖，迎合中下階層，反梁派幾難咬得佢入。
餐飲Ｍ講：「聽梁先生在立法會答問直播，兒童不宜，應該列為PG類節目，兒童要有家長陪同，先至可以睇，否則有樣學樣，細路容易花言巧語，講嘢冇句真！」唔，有句真嘅，不過要界定埋邊一個時空啫。譬如問：「你有冇講過冇僭建？」要問埋邊一年、邊一月、邊一日、邊一個小時，否則梁先生就會答：「嗰一刻我冇講過我冇僭建。」 《信報》編輯江麗芬在12月15日憶述，去年（2011）五月中一個星期日，梁振英約傳媒到佢嘅山頂大屋吃午飯，有人看到「玻璃篷連接兩間獨立屋」，多問一句屋內有無僭建，當時嘅答案就係：「所有加建的地方已依手續向政府入了圖則，所有加建物都非僭建，而是合法。」可憐唐英年就唔夠膽對記者講呢類說話嘞，年輕快遞員自然當唐英年係笨蛋。識得咁樣對答嘅特首，梗係醒目過人嘅啦，唔怪得係快遞員偶像，下列對答直情會令啲梁粉大叫好嘢：
李卓人問：「你同唔同意你個位（行政長官）係呃番嚟嘅，你同唔同意應該下台？」梁特首答：「僭建本身唔係一個大問題，因此我冇動機去掩蓋我上手物主賣俾我嘅時候已經有嘅建築物。」究竟梁特首詐聾吖還是李卓人問題太深，連極度聰明嘅人都聽唔明？你哋話嘞！