王維基創辦嘅香港電視（HKTV）未開台已經製作逾十部劇集備戰，令無綫唔能夠坐視不理。最新一期嘅無綫官方刊物《TVB周刊》登出一頁聲稱「傳媒關注組」發起嘅廣告（見圖），將HKTV劇中一啲激烈場面如食內臟、甩人頭、男咀男等cap圖，仲寫住警告字眼，暗示HKTV劇集太血腥暴力，唔係觀眾所需要嘅選擇。
剪輯重口味鏡頭
TVB高層樂易玲早前帶埋個仔出席活動，話對家啲劇根本唔啱喺免費電視播，仲話唔會畀個仔睇。不過有支持發免費電視牌嘅網友心水好清，將過去無綫拍過同樣重口味嘅鏡頭剪輯，惡搞番呢個廣告。如《萬千升呢福祿壽》和《金枝慾孽2》一樣有同性咀嘴場面，仲有《名媛望族》玩黑絲同咬唇。
講到暴力，啱啱播完嘅《大太監》都有髮簪插穿手，明寸無綫五十步笑百步。網民仲整理亞視版本，但只出現一個大問號，擺明係話亞視呢一年乜嘢都冇做過。
無綫外事部副總監曾醒明話廣告唔係無綫刊登，對於無綫有類似鏡頭，佢話：「TVB會不時作出檢討，會虛心聆聽各方面有建設性嘅意見。」
撰文：馮仁昭