守得雲開見月明嘅中央政策組首席顧問邵善波，坐正後不斷四出同各界人士飲茶灌水兼收風，而且仲同前任劉兆佳行得好埋，不時密會喎。
食飯食足兩個鐘
今個月10號晚，邵善波一收工就直標去中環陸羽茶室會佳叔，同場仲有中策組全職顧問關永圻、王卓祺以及《經濟日報》集團主席馮紹波等。佢哋一班人開咗間房，食咗差唔多兩個鐘頭先走，相信傾咗唔少嘢。
齋食飯吹水都唔夠皮喎。兩日後、即係12號晚，邵善波收工後，即刻趕去灣仔東惠商業大廈。究竟乜事咁急？原來係出席一個題為香港建設和管治條件問題嘅集思會，講者咪就係佳叔囉！
聽完佳叔分享都未夠喉，邵善波之後又同佳叔再一次食晚飯。到底邵善波點解咁想見到佳叔？唔通係想取經、問吓點樣改善形象？呢樣嘢，求人不如求己啦。