《天與地》以低收視、高口碑姿態奪「最佳劇集」，令廣大知音人自我Hyper，以為真的「命運能選擇」。不過實情要實現「真普選」，決定權唔喺你手，而在於TVB（511）。
噚日彭博有篇報道，訪問一個喺大摩打工26年，剛自立門戶榮升老闆嘅金融財俊，佢話：「華爾街所有人都係Overpaid，所以外界唔妥我哋可以理解。」咁反映於現今金融制度下，投資者每日都間接養到華爾街班人肥肥白白，你想唔養？Sorry，冇得揀。
推而廣之，作為核數師嘅你，真係想日日無償加班到天光？證券經紀又真係想日日㩒掣仲要俾客抦，硬食李小加嘅加時大計？但要搵食，邊有計？
套劇跑出，係因為「選擇命運」對香港人永遠只停留於「如果」嘅層次。生活、買樓甚至特首都冇得揀。《天與地》講追夢，正好畀香港人借機發一個浪漫嘅夢。
Fifi
本欄逢周二、四刊出