好友得勢不饒人，港股又創新高。國策股如風電、光伏股固然係勁，基金股亦有板有眼，創科（669）同建滔（148）齊齊炒高7%，粉飾櫥窗效應不可忽視；喺內地經營鐵路業務嘅廣深鐵路（525），基金股東陣容鼎盛，隨時成為下一輪嘜價對象。
根據交易所資料顯示，現時持有廣深鐵逾5%嘅基金達5隻，當中最重倉嘅就係歐洲股神安東尼波頓打骰嘅富達基金，揸住10.02%，最新增持日子係上星期三。雖然波頓早排俾民企股玩殘，但近期成績就認真唔錯，創科同頁岩氣概念股佢都有買，既然有勢有往績，不妨跟佢押注廣深鐵。
廣深鐵第三季賺4億人仔，雖按年倒退30%，卻是今年最佳季度，反彈勢頭明顯，中央加大鐵路投資，加上深圳前海發展，炒作概念多多，昨收2.88元，升1.4%，今年僅升4.7%，跑輸H指15%升幅，以PB 0.6倍及息率4.3厘秤，一旦獲資金垂青，股價坐三望四難度不大。
唐牛