【本報訊】年逾80歲的老花眼鏡店小販，於上環嚤囉街旁的後巷經營逾60載，將眼鏡及畫擺放在離檔口約10米外的樓梯轉角位石壆以吸引人流，但卻因此被食環署票控阻街及無牌擺賣，昨被重判罰款4,000元及450元。老小販開檔只為了過日辰及「搵餐晏仔」，面對重罰只能慨嘆︰「交唔出（罰款），入去坐都唔緊要！」
記者：鍾焯如 陸羽平
人稱添叔的嚴鏡添約於40年代起在上環經營「添記眼鏡」，惟位處隱蔽的弓絃巷，人流稀少，為了吸引人流。案發日4月22日，他將25副眼鏡及23幅畫放在人流較旺的樓梯街僅4.5平方米的石壆上擺賣，因而惹上官非。「以前俾食環署告過幾次，每次都只係罰三百、五百蚊，點知今次罰幾千蚊，我覺得唔公道！」
領有視光師牌
添叔指檔口人流少，「日不發市」的清況很常見，每月約只有500多元生意額。「幫襯嘅都係熟客，同佢哋修修補補啲眼鏡咁囉，每日10蚊、20蚊咁賺，唉！本來諗住開吓檔過吓日辰，點估到會搞成咁！」採訪期間一名婆婆前來更換老花鏡要補百多元，但她身上只得20蚊，添叔說「聽日先計啦」。
添叔領有視光師牌，他說：「日本仔投降後，香港物資好缺乏，我咪幫人修理下眼鏡、墨水筆咁，邊似得家啲眼鏡舖開到成行成市！」亦因他寫得一手好字，閒時亦會擺檔寫揮春和祝賀字帖，多次吸引傳媒採訪。
64歲的添嬸得悉老伴被罰四千多元，勞氣又心痛︰「都叫咗佢唔好再續牌啦！之不過檔頭可以畀佢過日辰，叫佢執咗佢咪仲慘！」添叔的妻子依靠綜援維生，兩人正打算向法庭申請延期繳交罰款。
添叔被控今年4月22日下午，於上環樓梯街佔用共4.5平方米的公眾地方，無合理辯解陳列25副眼鏡、23幅畫、一張圓凳及一槐木板，造成阻街，昨認罪後被罰款4,000元；另於上址無牌販賣眼鏡及畫，罰款450元。
傳票編號︰ESS29973、29974/12