做老竇嘅，最開心就係見到個仔生生性性，唔好行差踏錯，如果仲可以子承父業嘅話，咁就完美嘞！相信前英格蘭國腳恩斯家瞓着覺都識笑，因為佢個仔湯馬士恩斯做齊晒呢啲嘢，仲畀老竇效力過嘅兩大球會曼聯同利物浦睇中。據報，恩斯仔揀咗紅軍，好大機會喺1月升呢踢英超。
湯馬士恩斯踢開翼鋒，今季喺英冠嘅黑池光芒四射，20次上陣入13球同埋交出9次助攻，加埋佢都係20歲仔，前途無限，身價又唔係貴，所以好多英超球隊都想請佢過檔。最近英國傳媒報道，利物浦已經同黑池傾掂數，將會喺1月以600萬鎊（約7,600萬港元）轉會費簽入恩斯仔，有傳佢嘅周薪達2.5萬鎊。雖然單交易未落實，但記者影到恩斯仔已經買定架保時捷跑車（Porsche Panamera）嚟獎勵自己。
利記用24倍價錢回購
見到個仔將會踢番自己踢過嘅球會，恩斯當然都勁開心，但喺呢單交易入面最唔開心嘅人，我求大俠就覺得係利物浦班主約翰亨利。原來恩斯仔出身利物浦青年軍，但舊年紅軍就當佢係草，收咗黑池25萬鎊就送走佢；事隔年半，家竟然用24倍嘅價錢買番人返嚟，真係做咗水魚！
除咗恩斯仔之外，利物浦領隊羅渣士仲吼實車路士嘅前鋒史杜列治。英國傳媒亦講到真嘅一樣咁，話史杜列治會喺1月以1,200萬鎊加盟紅軍，而佢周薪仲會有6萬鎊㖭。不過，佢本身又唔係好勁，今季仲要傷多過踢，都唔知操唔操得番起。
利物浦最近都幾多新聞，好似西班牙小將蘇索就俾英足總罰咗1萬鎊。早前蘇索喺隊友兼老友荷西安歷基嘅twitter留言，話安歷基係基佬，又鬧佢痴痴地；結果英足總就覺得佢歧視同性戀，所以就罰佢。荷西安歷基戥老友無辜，「都係講吓笑啫，足總咁都要罰，唔係啩？」
