師奶呢期熱捧工展會，政壇「元秋」民建聯嘅蔣麗芸都唔例外，噚日同埋成班黨友殺入工展會掃貨，包括大大隻寫住「譚」字嘅利是封送畀黨主席譚耀宗。嘩，政界盛傳元秋有意喺下屆九西爭取連任；呢招「利是封」冧功，好容易令人聯想，係咪想掂譚耀宗畀佢玩多屆先？連同行黨友「Tree根」都睇唔過眼，笑佢係「擦鞋妹」，難得元秋唔介意。之後元秋仲喺場內掃咗約十個煲，叫人送去民建聯議員辦事處，但佢話會向要煲嘅黨友收返錢喎。
民建聯行工展使一萬
民建聯一行人合共使咗一萬蚊左右，元秋貢獻最多，漁農界何俊賢都唔弱。身為最年輕議員嘅佢，一去到工展會竟然係直標去北京同仁堂買安宮牛黃丸，一粒六百幾蚊，佢買咗兩粒，話要嚟鎮宅，話老人家一有中風迹象，啪一粒就搞掂，認真年少老成。