麗新系老闆林建岳阿媽余寶珠出山之謎解開了，原來岳少響應港交所（388）要求，令董事會多元化，除咗青年軍，亦要有歷練嘅人坐鎮。港交所明年9月先實施新例，岳少咁早響應，認真唔話得！
麗國（191）上月底宣佈，87歲嘅余寶珠由非執董轉做執董，老人家無端端出山令市場好多揣測。
平日指點多 索性獻身
岳少同林老太噚日雙雙缺席麗新系股東會，由集團今期大紅人、麗國副主席周福安解畫。佢話，林老太平日對集團有好大貢獻，好多指點，董事局好尊重佢嘅意見，所以委任佢做執董就係要體現佢對公司嘅貢獻。
港交所近月又建議董事會多元化，例如搵多啲女性入局，遲吓會修例，明年9月實施。周福安就好認同咁話，董事局唔可以全部都係年輕人，要有歷練嘅人坐鎮先得。照咁講，新地（016）郭老太係咪都要考慮出山呢？郭炳湘最近同岳少咁friend，兩位老太應該都有偈傾。