隔牆有耳:<br>大磡村做騷 嫻姐發火鬧政府 - 李八方

隔牆有耳:
大磡村做騷 嫻姐發火鬧政府 - 李八方

電影界希望將大磡村變電影工業園,但呢件事傾咗五、六年,塊地仍然曬緊太陽。工聯會陳婉嫻噚日聯同商務及經濟發展局局長蘇錦樑,以及香港電影工作者總會會長吳思遠,實地視察大磡村。吳思遠借口碑甚佳嘅李安新電影《少年Pi的奇幻漂流》,批特區政府做事慢吞吞,話李安返去家鄉台中拍呢套戲,當地政府大開方便之門;反觀港府批塊地畀電影界就拖足咁多年,業界嗌晒救命,嫻姐亦發火,鬧政府唔應該一味拖字訣。

聽到大導演發火,蘇錦樑依然你急我唔急咁款,打官腔話稍後會就大磡村發展諮詢黃大仙區議會。吳思遠話對此見怪不怪,又警告政府再唔發免費電視牌,就變無能政府。