愛華頓嘅「爆炸頭」費蘭尼，喺上周六英超對史篤城場波，陰陰濕濕咁用頭撞對手梳爾哥斯；雖然當時逃過法眼，但最後都俾足總秋後算賬，罰佢停賽3場。換言之，愛華頓喺聖誕快車賽期，會冇咗呢位比利時中場悍將，認真頭痕。
愛華頓喺上場英超1:1作客賽和史篤城，球證賀斯喺賽後報告度，指出佢同旁證都冇見到費蘭尼頭撞梳爾哥斯；不過爆炸頭同領隊莫耶斯喺賽後已經認定錯，足總亦憑比賽錄像定佢罪。
快車3場全停賽
費蘭尼停賽3場，換言之喺周末開始嘅英超聖誕快車，全部唔使預佢；包括作客韋斯咸、主場對韋根同埋車路士呢3場波。有趣嘅係，一路盛傳車路士對費蘭尼非常有興趣，打算喺明年1月開價2,000萬鎊（約2.5億港元）斟介，即係話佢將會錯過對戰潛在新東家嘅比賽。
愛華頓冇佢唔識贏
費蘭尼喺愛華頓嘅重要性就唔使講，佢喺今季英超15次為愛華頓上陣入咗8球，每兩場波就入到一球，仲先後喺曼聯、曼城同阿仙奴身上入波；而喺佢缺陣嘅兩場比賽，愛華頓對住昆士柏流浪同埋諾域治都係贏唔到。
愛華頓家喺積分榜排第6，只係落後第4嘅熱刺兩分，仲有唔少積分差距唔大嘅球隊，喺後面來勢洶洶；聖誕賽期咁關鍵，作為主力嘅費蘭尼反而可以得閒去放假，愛華頓真係多得佢唔少喇。