好多打工仔都有個夢想，就係返工唔使做又有糧出。有調查就發現呢類hea工其實唔少，六成半受訪打工仔話返工經常玩社交網好似facebook咁；有一成半人更加平均每日玩足三粒鐘，非常hea。
人力資源機構CTHR.hk今年8月訪問1,063名來自14個行業嘅打工仔，調查佢哋返工上網習慣。有六成半受訪打工仔老實承認，返工會玩社交網，過半數人每日平均玩一粒鐘，大部份人都話係為咗吹水，有人則為打機，但亦有約兩成人否認「吞pop」，話上社交網係工作需要。
吹水打機講是非
調查同時訪問咗201位僱主，過半數僱主其實唔like員工返工時間玩社交網站。近七成僱主認為會降低工作效率，又擔心員工會洩露公司機密，或者講公司是非，打擊士氣。佢哋擔心嘅唔係冇道理，調查發現超過三成打工仔上網鍾意講同事是非，當中七成人更加係毫無顧忌咁唱衰上司或同事。
雖然係咁，但八成受訪僱主都話唔會監察員工網上言行，因為唔想員工反感，又相信員工會適可而止。調查機構就話，社交網站令工作關係模糊化，七成半打工仔將同事加為社交網站內嘅「朋友」，有近四成人更將上司加為「朋友」，建議企業可以主動利用社交網站為公司宣傳，營造良好僱主形象，同時向員工發放清晰指引，減低員工吞pop同洩密嘅機會。
打工仔返工上社交網為乜？
睇朋友做緊乜嘢兼留言（79%）
睇吓網上有乜嘢熱門話題（52%）
用即時通訊功能吹水（46%）
認真，為公事搵行家（24%）
認真，實行家做緊乜（23%）
老細要求，奉旨上網（19%）
打機、打機、打機（13%）
資料來源：CTHR.hk