張敬軒今年6月已約滿環球，馮仁昭收到風佢會簽英皇發展內地市場，家喺內地幫英皇打骰嘅霍汶希答應幫佢。軒仔嘅契爺、契媽牆紙大王陳鼎禮夫婦同楊受成好老友，加上軒仔嘅密友關智斌又喺英皇，所以軒仔決定過檔一家親。
據知軒仔仲欠環球廿幾首歌，佢要趕出一隻碟，係翻唱別人嘅歌，淨番嘅十幾首歌債要賠錢甩身，聽講都要成七位數，英皇答應幫軒仔賠錢，既然軒仔走硬，環球喺頒獎禮都唔幫佢爭獎，嚟緊嘅年尾頒獎禮，睇嚟除咗派獎嘅新城之外，軒仔喺其他台都會捧蛋。記者噚日致電軒仔經理人問到係咪過檔英皇？佢話：「未知喎，未諗清楚。」
方大同約滿搶手
至於冇咗軒仔嘅環球，聽講會向方大同埋手，方大同喺11月同華納完咗經理人合約，唱片合約就明年中約滿，黃柏高嘅太陽娛樂、星煥、環球都加入「爭同戰」，薛凱琪仲幫黃柏高做說客，不過，據知方媽媽想大同自己開經理人公司，只係簽歌手合約畀唱片公司，肥水不流別人田。
撰文：馮仁昭
