Spike Lee忘記林書豪
紐約人嘅忠實球迷、名導演Spike Lee（圖右）喺上季經常着住林書豪球衣嘅情景依然歷歷在目，嗰陣佢仲話會將林書豪嘅故事拍成電影。不過時移世易，Spike Lee家嘅口風已經完全唔同晒：「我的確已經將林書豪遺忘咗，家紐約人打得咁好，我哋肯定會入總決賽。係林書豪放棄紐約人，唔係紐約人唔要佢；不過我冇憎佢，中場休息嗰陣我仲會過去同佢打招呼嘅！」
遲到女記者廁所工作
林瘋重返麥迪遜，矚目程度絕對可以用誇張嚟形容。大班記者一早已經嚟到準備做採訪同現場報道，但一樣要排長龍等入球場，情況就好似林瘋喺今年2月大爆發咁樣。傳媒室佔一半都已經塞滿嚟自兩岸三地嘅記者，據講有個稍為遲咗到嘅女記者，喺周圍都冇位嘅情況下，焗住要喺女廁度做嘢。
費頓被林瘋比下去
林瘋走咗，紐約人喺今季前除咗簽咗老將傑特之外，亦都羅致咗另一位控衞費頓。費頓喺對火箭呢場波賽前牙擦擦，話唔需要再緬懷林瘋傳奇。不過得把口講冇用嘅，場上表現始終可以證明一切；費頓喺今場波嘅數據完全被林瘋比下去，全場18射只中7次，只係得14分同埋4次助攻。