恒指歷史市盈率11.6倍，市賬率1.51倍，相對長線平均值嘅1.8倍，依然係偏低水平，如果閣下同晉佳一樣，睇好出年環球經濟回穩，冇錯！只需經濟回穩，都唔使講話復蘇，股市已經有相當唔錯嘅上升空間。雖然港股中線有可能進入整固階段，但仍可考慮吸納估值低迷、業績跟隨內地經濟周期起落嘅股份，博出年大翻身。
近排晉佳較鍾意傳統行業股，之前提到航空股、石化股，只要估值仍然係「衰退價」，基本因素冇乜問題，都可以持有。
最近留意埋注塑機行業股份，包括震雄集團（057）同海天國際（1882），前者喺低位造個3個月嘅圓底，醞釀回升，後者股價接近1年高位，跌極都跌唔落，兩隻都可以考慮，但晉佳偏好行業強者多過老牌公司，所以較鍾意海天。
海天睇14.5元
注塑機，即係製造塑料產品專用嘅機器。塑料產品同經濟周期有莫大關係，喺汽車、建材、包裝、信息技術、家電同其他消費品都用到。比較上述兩隻注塑機生產商，海天執行能力明顯比震雄好，收入係對方嘅3倍，市場地位較高；毛利率亦較高，今年上半年達29.7%，震雄只得24.9%；海天嘅銷售同行政開支，分別佔收入8.5%同4.7%，明顯低過震雄嘅9.8%同6.9%。
至於估值，海天今年上半年每股盈利下跌21%，至30分人民幣，照睇下半年應該保持上半年咁差，年度化市盈率12倍都合理；震雄截至9月底止，上半年度每股盈利8.9港仙，年度化市盈率12.8倍，但上半年錄得2503萬元其他經營支出，如果下半年冇呢筆支出，盈利表現會更好。以此估計，兩者市盈率差不多，但海天經營能力較強，應該係比較好嘅選擇。
睇圖表，震雄9月至今形成圓底，中線閒閒哋升三成試3元唔成問題；至於海天，周線圖醞釀上升三角形，突破10元阻力，量度升幅睇14.50元，可升五成。一句講晒，兩隻都諗得過。
晉佳
本欄逢周一、三及五刊出