信置（083）上周五宣佈將九龍灣國際交易中心七層樓面，以15.67億沽畀一間香港註冊嘅人壽保險及退休福利公司，通告上連公司名都冇，慌住俾人查到咁，非常神秘。明查暗訪之下，買家原來係恒生銀行（011）旗下恒生保險。
呎價8000非自用
聽講，恒生保險買國際交易中心16至22樓未必自用，投資居多，投資落磚頭夠晒保值。市場今年中都傳過，恒生保險想向新地（016）買入葵涌九龍貿易中心B座，只係最後唔成事。
呢單刁作價其實幾抵，事關政府大力發展東九龍，吸引唔少金融或保險公司搬過去，投資氣氛亦好濃厚，寫字樓買賣呎價已經過萬，恒生保險買呢七層樓，總樓面19.6萬方呎，呎價約8000元，仲唔係筍價？