美國《時代》周刊應該今日公佈年度風雲人物，至於2012年度香港風雲人物，八方覺得狼振英可以上榜，事關佢單靠把口，就冧掂市民、選委以至阿爺，擊敗唐唐做特首。可惜，精通語言偽術、靠把口喺選舉論壇食糊嘅佢，最終竟然亦衰在把口，喺僭建問題上前言不對後語，誠信盡失，金句令香港人嘆為觀止，狼振英靠把口，就可以掀起無盡風雲。
唇薄嘅人唔重感情
特首選舉期間，狼振英不停四出拉票講政綱，打住求變旗幟嘅佢，將自己包裝成香港奧巴馬咁，確實好得市民同選委嘅歡心；點估到原來口甜舌滑嘅呢一把口，最終會令佢露出洋相，成為大話特首？
一宗僭建醜聞，證明八方嘅指控好紮實。明明有僭建又唔認，厚顏推稱唔知要通知屋宇署有僭建，仲夠膽高呼自己「開誠布公」。最離譜當然係近期爆紅嘅一句：「我記憶中，我冇講過話我冇僭建」，唔通真係當全香港人儍嘅？
狼振英禍從口出，可能同佢面相有關。玄學家麥玲玲話呀，狼振英嘴唇好薄，而唇薄嘅人，係講嘢好快兼好識講嘢，八方有理由相信，狼振英因此有高超嘅語言偽術技巧。事實上喺相學而言，唇薄嘅人係唔重感情兼信唔過。《時代》周刊6月曾經將狼振英擺上封面，題為「香港可以信任這個人嗎？」（CAN HONG KONG TRUST THIS MAN？），事隔幾個月，答案擺在眼前。
mailto:[email protected]