由唐唐舊部成立嘅經濟民生聯盟噚日舉行成立典禮，成員幾乎係唐唐選特首嘅班底；但係啱啱喺南美玩完返港嘅唐唐偏偏冇加入，似乎唔想咁高調。
被視為聯盟金主嘅監事會主席林建岳都有出席，身為唐唐老友嘅佢強調聯盟「不倒梁」，仲話倒梁等於倒米，令香港裹足不前。身兼聯盟主席嘅梁君彥上台致辭時，就形容家吓係「價值顛倒，是非混亂」嘅世代，全場爆笑拍掌，唔知係咪暗自忖度：係咪寸緊台下嘅狼振英呀？聯盟新標誌顏色同自由黨一樣用上藍、綠色，望落個形狀有啲似有線電視嘅標誌。
自由黨田北俊同周梁淑怡就冇現身，只派方剛出席賀前黨友另起爐灶。