一直同鄉議局主席劉皇發打對台嘅屯門鄉委會主席何君堯（圖），早前成立「新界屋宇僭建物合法化關注大聯盟」，上個月仲帶住幾百個村民衝擊鄉議局大樓，有人更直斥發叔係「人渣、縮頭烏龜」，結果辣㷫一眾鄉頭，覺得何君堯冇理由咁唔尊重老人家。
噚日鄉議局執委會，發叔雖然抱恙缺席，但唔少鄉頭主動話要討論呢件衝擊事件，誓要幫發叔出番啖氣。有鄉委會主席就不點名話，「有人」對人不對事，攞住鄉議局個招牌嚟玩。雖然冇指名道姓，但明顯針對何君堯；在席嘅何君堯都唔輸蝕，兩度發言反駁，話唔覺得嗰次事件係衝擊，但又對呢事表示遺憾喎。