【萬千星輝頒獎典禮2012之事業心重】楊怡真正事業愛情兩得意，前晚打低徐子珊成無綫視后，男友羅仲謙當場開心落淚，她昨日在葵芳宣傳新劇時被謝天華、梁烈唯勁玩，但楊怡依然拒絕講愛的宣言，揚言日後大把時間，原來她事業心更重，希望像黎耀祥般三度稱后。
楊怡前晚贏得視后即激動爆喊，跟眾人擁抱但沒男友羅仲謙份，謙謙則開心落淚。楊怡工作完在昨日凌晨12時步出電視城，與三十多個粉絲飲香檳慶祝，楊怡還興奮大叫：「四太太萬歲！」跟粉絲合照、簽名完，楊怡再次喊住說：「多謝支持我嘅人，我好怕令大家失望，最好好似祥仔咁，三連霸！」楊怡隨後由經理人送返將軍澳屋企，問有否跟謙謙慶祝，飲了香檳的楊怡說漏嘴：「要打畀佢呀……唔係，咁夜改期啦。」向記者送上飛吻便上樓搵謙謙。
天華跪地求婚玩嘢
楊怡昨日到葵芳宣傳無綫新劇《法網狙擊》，其間謝天華拿着花向楊怡下跪說：「請你嫁畀佢！」擺明玩她與謙謙的緋聞，但楊怡受落冧笑說：「邊個佢呀？」在旁的許紹雄說：「好謙虛嗰個呀！」梁烈唯也說：「你攞獎佢喊嗰個呀！」謙謙之名呼之欲出，天華簽長期飯票給楊怡時，署名也簽MR.LAW。
被玩的楊怡心情大好，她說：「冇諗過攞獎所以冇安排慶功，終於有覺好瞓，之前有無形壓力。」她透露2月開劇前跟媽咪旅行慶祝，但沒有預謙謙：「佢有發短訊讚我犀利，我都覆電話叫佢唔好喊，叫佢自己攞至喊。」楊怡又笑言沒攬謙謙是因他沒站起來，為何不講愛的宣言，楊怡說：「吓？兩回事喎，工作先，呢啲大把時間。」她否認加簽五年合約，但承認望加人工。
出爐視帝黎耀祥昨日返將軍澳電視廣播城拍新劇《傳愛事務所》，談到宣佈賽果時馬國明表現愕然，祥仔說：「大家傾向林峯粉絲多啲，我都愕然，始終唔同遊戲規則、唔同比賽都冇絕對公平。」會否加人工？祥仔說：「想㗎，我一直偏低，有藉口加價。」
262萬觀眾捧頒獎禮
失落視后的米雪昨日到新光戲院出席《我和春天有個約會》記者會時表現輕鬆，揚言沒失望，對有說一人一票機制透明度不高也不介意。
此外，前晚播映的《萬千星輝頒獎典禮2012》平均收視36點（約230萬觀眾）、最高41點（262萬觀眾）是頒最佳劇集《天與地》的一刻。頒獎禮共接獲63宗投訴，包括24宗不滿視帝賽果，10宗不滿視后賽果，9宗不滿劇集賽果等，有3宗投訴時間控制不好。
採訪：楊潔雯、朱志聰、吳耀輝
攝影：葉君海、黃文偉、仇志德