美國漫畫《Watchmen》說，拯救世人毋須超級英雄，反而要公眾敵人，大壞蛋一出，世人自然齊心抗敵。梁振英硬推洗腦教育，不用蝙蝠俠出手，港人萬眾一心迫使CY擱置，23條之後未曾如此團結。
陳滿鴻神父向來敢言，他盼望CY這個「大眾箭靶」留任，繼續倒中共的米：「公民抗命是香港現在需要發展的，唔需要咁急要佢落台。家香港人睇穿中央（陰謀）都係因為CY，我哋養佢耐啲先！」陳神父絕非曲線保梁，他鼓勵大家1月1日上街鬧爆狼英：「（遊行）團結社會，有focus（焦點），maintain（維持）反對派士氣，係有用嘅。」
撰文：陳勝藍 攝影：胡堅
陳滿鴻行年60有5，是陳日君樞機口中比他更激的神父。最令陳滿鴻激憤的，不是梁振英大話連篇，而是京人治港，「一般官員嘅錯誤，好多國家領袖都有，但香港唔同，問題根源係中央對香港嘅干預，超過當初嘅設計，當初設計係河水不犯井水」。以往北京只會暗渡陳倉，統戰籠絡，「一向中央暗中做好多嘢，到梁振英、唐英年爭做特首，我覺得中央唔止做好多嘢，而且做埋莊仲做埋閒，明又做暗又做！」
望港人長期抗爭
中聯辦正是擺明凌駕特區政府，「中央態度似乎係，以前好小心做，怕你唔滿意、怕你驚、怕你唔鍾意；家我唔需要怕你，我直情話畀你聽我係咁做！正因為咁，呢個『明』令香港人睇穿佢『櫳嘢』，香港好多人本來不問世事，咁樣鼓勵好多人醒覺，社會反彈喺23條之後最明顯，正因為中央太明顯」。
陳神父希望港人一鼓作氣，公民抗命長期抗爭，「公民抗命畀市民一份尊嚴，雖然抗命最後都係輸，但起碼有尊嚴」。他呼籲大家響應「長毛」梁國雄、韓連山提倡的不合作運動，少交10元稅，「不合作唔表示我犯法，我唔交10蚊稅，你催我就交，你有本事就處理幾十萬人嘅delay（遲交），發信囉，你發信我就交。用不合作手段，令政府唔好隨便激嬲人」。
好些宗教領袖攀附權貴，指所有政權的權力都來自上帝，人民必須服從，陳滿鴻絕不同意，權力固然來自上帝，但要取之有道。「如果保證everybody（所有人）有份選，選出一個人比CY更差，唔緊要，都合法，因為全部人同意，如果人人可以選，今次選咗隻狗、狼出嚟，下次可以選隻豬、牛。」
若然梁振英、北韓領袖金正恩的權力都來自上帝，記者難免要問祂搞邊科，陳神父解釋：「正如上帝畀能力一個人去斬人，再難聽啲講，一個強姦犯，佢強姦嘅能力都係上帝畀佢！」
《舊約聖經》有人問上帝何不消滅昏君，港人也想問祂何時收拾CY。「上帝唔會因為你唔係好人，所以令你殘廢，上帝唔會斬人，上帝畀晒啲嘢大家，希望人按照道德、公義、好心去做事」。
看來CY只會繼續禍港，但陳神父派定心丸，惡人再多，神總會確保世間有足夠好人。難道天主通過CY，突顯香港人的公義？「上帝能從壞事中產生好事，因為CY咁差，產生好效果，就是人民醒覺。你的分析是對的，God can draw a straight line from crookedness（神能用曲筆劃直線）」。梁振英原來是天主重用的人，失敬失敬，不過他是飾演反派，「歷史逃唔出上帝安排，無論幾多人反叛、幾多衰人，都控制唔到歷史發展，係神控制，即係你所講，你係奸角，不過係上帝所知嘅奸角，劇本有你份」。
CY差反有好效果
不合作運動是要迫使當權者收歛，而非改變，因為共產黨死性不改，「歷史上冇一個共產黨變，共產黨只會唔喺度，停止運作，但未試過改變路線」。習近平上場，中共也不會變，因為對付異己的不是習總，而是秘密組織，「有啲似東廠，東廠組織維持個黨存在，所以習近平唔係直接管我哋，任何壓迫、拉人、被消失、處決，唔係佢主意，係東廠主意，但習近平唔敢郁呢班人，因為呢班人保護佢。正如你屋企養隻狗，周圍係賊，對你不利，你唔會劏咗隻狗，你會任得佢咬人，咬錯人好過你死！」
昔日東歐共產政權隨經濟結構崩潰，中共雖然富可敵世，但用太多錢維穩，未必不會重蹈東歐同志覆轍，「幾多人負責網上保安？60萬人，60萬人要食飯嘛大佬呀，以前就話唔使錢同你做啫！共產黨樣樣靠派錢，我覺得係隱憂」。
陳滿鴻生於戰後，是三兄弟中的大哥，入讀九龍華仁書院，深受神父們恩德，後來考入理工學院讀測量，算起來梁振英還是他後輩。他畢業後不滿英國政府管治，拒絕在建制下擔任公私營職務，卻入修道院，立志從宗教層面服務社會，目前主理慈雲山聖文德堂。
回歸後才發現英國不是最差，偉大祖國更差，「香港以前殖民地最貧窮時都有得食，冇屋住？佢起屋，起碼殖民政府搞掂人民生活，做得好唔好唔講」。特區政府呢？「衣食住行冇樣掂，家未曾餓死因為食老本！」
英國從香港捧走很多錢，但帶來文明，中共給我們錢，卻奪去文明，兩害怎樣取其輕？「憑良心講，（香港）前後都係殖民地，好簡單，以前我揸BNO，英國唔收我，家揸特區護照，如果冇回鄉證，（大陸）畀唔畀我返去？單從牌面計，唔睇內心，我家係中國人，同以前作為二等英國人，差唔多啫，都唔可以去（祖國）；第二，以前我係英國屬土公民，但冇得選首相，家有冇得選（中國領導人）？連港區人大都冇得選呀，家我哋不如殖民地」。
陳滿鴻言無不盡，記者感激，卻擔心今次訪問為他惹麻煩，「如果我講嘅嘢冇違反教會教條，任何人都唔可以叫我唔好嘈！你可以唔鍾意我講嘅嘢，但我邊句違反教廷？如果冇，你最多話我張揚，可能招致政府報復，但家報復咗好多啦，家政府對教會基本上冇利益，唔需要怕政府！」
反對歧視同性戀
他一直炮轟共產黨同志，但反對歧視同性戀同志。他指《聖經》斥責同性戀行為，但世人都有罪，我們的罪不比同性戀高貴，他認為明光社對同志的批評過火：「我覺得社會太極端，一啲太針對同性戀者，一啲太維護，明光社稍為過咗公道，批評多咗。」他維護同志人權，毋懼壓力，「只要我嘅言論唔超過教會標準，我可以自由講，我仍然唔贊成呢個行為，咁就夠喇，有呢句就夠喇，哈哈！」