中環在線:<br>柯大俠 肉酸連任 - 李華華

中環在線:
柯大俠 肉酸連任 - 李華華

國際資源(1051)股東用票抗議!公司噚日開股東會,主席趙渡同獨立非執董柯清輝尋求連任,竟然分別有41.8%同33.7%股東反對,雖然議案獲通過,但話晒兩位喺財經界有頭有面,咁多股東唔like,點都要關注啦。

國際資源股價不濟

睇番國際資源09年股東會相同議案,反對趙渡同柯清輝連任,唔夠1%,因乜事今次股東咁大反應?單睇過去一年,公司又配股又印尼礦場停產,股價單日跌超過一成都見過好幾次,心血少啲都嚇親,難怪班股東唔妥。
近排都有唔少股東用票表示對董事嘅不滿,好似新世界發展(017)創辦人彤叔孫女鄭志雯、新地(016)郭炳江連任時都有超過兩成人唔like,董事們真要警惕吓!