政府軟硬兼施要求港台成為喉舌，繼早前打算腰斬《議事論事》，大搞單對單訪談節目《星期五主場》讓高官自我宣傳後，原來以廣播處長鄧忍光為首嘅管理層，對《城市論壇》亦好不滿，早前仲一度想干預《城市論壇》嘅編輯自主，不滿港台員工「擺空凳」諷刺龜縮官員吳得掂。
港台員工：反抗到底
話說《城壇》喺9月初討論洗腦國民教育時，吳得掂同開展德育及國民教育科委員會主席胡紅玉龜縮，多番拒上節目，《城壇》製作人員，惟有擺咗張空凳畀「邀請中」嘅吳得掂同胡紅玉。
點知呢件事觸怒咗管理層，要求電視部公共事務組檢討有關空凳嘅安排，但港台員工認為擺空凳嘅做法並無不妥，唔應該扼殺製作自由。點知管理層死心不息，要求制訂「內部指引」，日後決定擺放空凳時，要首先取得助理處長嘅同意。
港台員工批評「擺空凳」要助理處長批准，即係干預港台節目製作人員嘅編輯自主，事件惹起內部反彈，認為「擺空凳」係經深思熟慮，毋須再向管理層申請。港台員工表明要反抗到底，絕不容許擺張凳仔都要管理層管！