無官一身輕，睇吓前高官王永平、馬時亨經常月旦政事，就知唔使落場，靠把口「炮轟」好過癮啦。原來唔使做議員仲風騷，一班退下火線嘅前立法會議員噚日返立法會午宴，個個叉足電笑容滿面，唔使拉布係唔同啲。好似潮州怒漢詹培忠咁，上個月先俾人毆打到口腫面腫，唔使一個月，就容光煥發。
立法會噚日宴請前議員食飯，出席嘅包括黃宏發、程介南、夏永豪、劉炳章，連詹Sir都有現身。八方見佢英姿颯颯，面上嘅瘀傷全部唔見晒，詹Sir仲笑問八方：「我係咪靚咗呀？係咪唔同咗呀？」見佢笑容滿面，仲即時擺post影相，就知佢冇事。
詹Sir以前做過細胞技術美容，想塊面回復青春，貪靚程度有十粒星，但係佢死都唔肯講幫襯邊間美容院，唔想幫人宣傳喎。
蔡菜子：必當選人大
回巢嘅仲有開公關公司嘅民主黨李華明。阿Fred話，金寶湯係佢客仔之一，因為對方想了解吓有關食物條例，所以除咗賺到顧問費外，阿Fred仲獲贈美國牛肉。佢間公司喺海富中心，80呎辦公室月租7,000蚊。
人稱「蔡菜子」嘅民建聯蔡素玉都有食飯，仲嘻嘻哈哈豪爽使咗幾百蚊，幫襯立法會買紀念品。咁得閒，唔使拉票選人大代表咩？蔡菜子拍晒心口話自己一定當選，唔使同佢擔心喎。咁又係，呢個係小圈子中嘅小圈子選舉嚟㗎嘛！
mailto:[email protected]