晨早流流，沙田陳太睇蘋果日報之香港地溝油新聞，為之惡心，睇吓睇吓，睇到內文話「裕滿人家」向呢間「永興油行」買油，不禁大叫一聲，原來佢經常幫襯沙田駿景園嘅「裕滿人間」，仲讚過呢間飯店嘅小菜有水準，缽仔飯有味道，值得向親友推薦㖭。中文大學有好多教職員住在駿景園，普遍對「裕滿人家」有好感，死咯，「裕滿人家」嘅食油供應商係永興油行，唔驚就假，中大榮休教授關信基係駿景園其中一座嘅委員會主席，怕要請佢出頭調查吓呢間「裕滿人家」至得。
中大職員Y打電話嚟講：「喂，蘋果日報講永興行送油去俾長沙灣嘅裕滿人家啫噃，冇提到駿景園嗰間呀？」唔，都有嫌疑啫，連鎖式食店集團慣咗集體團購嚟壓低供應商來價，永興油行唔會只係向「裕滿人家」一間分店供應啩？呢間駿景園分店如果唔急急澄清，因住流失人客。
大陸歪風襲港，令人痛心搖頭，連年食材價格高漲，加上最低工資，食肆力謀削減成本，乃人之常情，但以非法非道德手段來謀利，應受到所有消費者抵制。佛利民話企業之唯一社會責任就係賺錢，但要（subject to constraints）法律及道德制約。中國內地有法不依，執法不嚴，官場貪腐嚴重，再加上文革遺毒（打倒孔家店，摧毀傳統儒家道德觀），先至出現種種不同之假藥，假奶，假蛋，假酒，假油……荼毒人民，在以官場清廉自傲，行事有效率嘅香港特區，原應冇呢啲事發生，否則食環署及消防局嘅高級官員，以至高永文局長、黎棟國局長等統統要辭職！成日得把口死撐冇僭建，唔記得有講過冇僭建嗰位特首呀，做實事就係保障香港食物安全，不容許永興油行呢類事件發生呀！
可恨嘅就是實事做唔到，虛應故事，擾民之事就猛咁想，特區政府竟然變成腦殘，衛生局副局長陳肇始聲言「企硬」，禁止3歲以下嬰兒奶粉賣廣告，趕絕一年近十億元嘅奶粉廣告，此舉嚴重影響企業言論自由，消費者知情權，廣告行業生存權及傳媒之正當營業收入，有理性之人，非企硬反對不可。香港戰後多年來，嬰兒食奶粉為主，一向無甚麼嚴重衛生健康問題，香港新一代比上一代更高更健碩，陳肇始唔好以為自己係教授就有資格胡扯。