臨近年尾，海通國際（665）連環有人走，最近先後有兩位行內人同散戶熟識嘅高層走咗。其中一位係大福證券（海通國際前身）年代老臣子李耀榮（William），另一位就係最叻講股嘅郭家耀（Matthew），Matthew近日變咗做獨立股評人。
聖誕新年去加探女
William做到上月底，聽講佢年中已經遞信，公司8月底宣佈，佢9月開始辭任執行董事，只做副行政總裁，原來當時係為全身而退鋪路。
佢話諗住休息吓，撞啱聖誕、新年假期，佢會飛去加拿大，探吓喺加國讀書嘅乖女，明年初回港先有安排，總之唔係咁早退休。
查實海通09年底宣佈收購大福證券後，好多大福高層相繼離開，「生招牌」前行政總裁黃紹開舊年初率先退休嘆世界，跟住係講股嘅杜冠雄同麥德光。William同黃紹開做咗同事好耐，連佢都走埋，海通越來越少大福人剩。
郭家耀明年新開始
至於本身係海通人嘅Matthew，近日亦改用獨立股評人身份。Matthew 09年中，海通未收購大福時加入海通，佢今次離職照計同去大福化冇關。佢噚日證實已經辭職，話喺海通做咗三年幾，有其他打算，可能1月中就有新動向㗎喇！
都係嗰句：變幻才是永恒。
李華華
mailto:[email protected]