內地體育用品股前一哥嘅李寧（2331），噚日公佈「渠道復興計劃」，內容包括「減少陳舊存貨」、「改善產品新鮮度」等，預計一次性費用14億至18億人仔。說穿了即係為存貨撥備再加盈警，體操王子嘅語言藝術，絕對拍得住狼英嘅語言偽術。
中國經濟工作會議剛結束，三農政依然係重點，早排推介嘅一拖（038）穩步上揚，可坐定定等食糊。主要為客戶提供節水灌溉系統一站式解決方案嘅天業節水（840），同樣受惠國策，噚日走勢出現突破，值得望多兩眼。
集團首3季賺640.7萬人仔，按年下跌65%，拖累股價由今年高位插水41%，但投資價值卻浮現，現價PB僅0.56倍，比水務股普遍有溢價嚟講，折讓得離譜，扣除債務後處於淨現金狀態；市值唔夠2億銀，細細粒容易炒。
天業節水昨收0.93元，升4.5%，圖表呈靚圓底，成交亦配合，短炒博見1.10元，潛在升幅18%，屆時PB都未夠0.7倍。
唐牛