抱住無限嘅失望，失落世冠盃嘅車路士喺周一返到英國；巴西小將比亞桑發炮狂轟班正選冇心踢，都唔知呢番話會唔會影響軍心！但領隊賓尼迪斯冇咩時間去理，因為車路士周三就要喺英聯盃8強作客列斯聯。殘陣出擊，賓尼迪斯呢場又要頭痕嘞。
我求大俠真係覺得18歲嘅比亞桑好勇敢，係人都知車路士有唔少老大哥，得罪咗就肯定冇運行，但呢位喺世冠盃坐足兩場冷板嘅小將竟然大鬧班正選hea踢，所以搞到喺世冠盃決賽輸波，「我哋真係唔值捧盃。我所見，場上嗰隊車路士根本好似唔想贏咁，我真係接受唔到囉！我認為只有大衛雷斯同拉美利斯呢兩個巴西球員踢出鬥志，所以佢哋好唔開心。」
大鬧班正選hea踢
比亞桑賽後喪插自己友，加利卡希爾就鬧爆對手，搞到佢拎紅牌。喺決賽嘅下半場，加利卡希爾侵犯哥連泰斯嘅馬斯奧艾馬臣，而球證就直接向佢出示紅牌，但加利卡希爾好唔滿意：「我嗰吓嘅力度連我1歲嘅女都唔會跌低啦！我家都仲好嬲呀！佢擺明係覺得借勢可以跌，所以就掩埋塊臉喺地下碌咗5分鐘。」嬲都冇用啦，加利卡希爾將會喺周三對列斯聯嘅英聯盃8強自動停賽一場，國際足協仲話喺呢個星期內開會傾吓要唔要追罰㖭！除咗加利卡希爾，約翰米基爾同拉美利斯都被英足總罰停賽，加埋泰利同奧里奧爾羅美奧受傷，車路士中後場突然冇晒人，惟有靠晒復出冇耐嘅林柏特頂住。可憐林伯34歲，小腿先啱啱好番一個星期，舟車勞頓完之後都仲要喺英聯盃搏殺！
林伯係時候落車
不過，林伯喺車路士嘅日子都進入倒數，球會無咩意思同佢續約，搞到佢都意興闌珊，話唔定遲啲轉去昆士柏流浪；更有報道指，車路士已經計劃買羅馬嘅比真歷番嚟頂林伯。