麗新系老闆林建岳呢期好紅，除咗娛樂版、財經版，政治版都要預埋佢。事關立法會第二大政團香港經濟民生聯盟今晚喺會展舉行成立酒會，CY都會畀面出席，傳咗好耐話會成為盟友嘅岳少，據講亦會現身。
商界大計多多
經民聯由七位立法會議員牽頭成立，包括林健鋒、梁君彥、石禮謙同代表金融服務界嘅張華峰，岳少同張華峰唔單止friend，仲合作搞食肆，做埋盟友一啲都唔出奇。
咁啱岳少最近動作多多，上個月先同新地（016）大股東郭炳湘合作投到一幅將軍澳地皮，跟住就話媽媽余寶珠出山，由麗國（191）非執董變成執董，豐德麗（571）之前又計劃同麗豐（1125）喺橫琴發展文化產業項目，喺商界已經咁多大計，家仲要加入政黨，隨時成為大金主，認真唔得閒。唔知佢位投地拍檔郭炳湘今晚會唔會出現呢？