咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
喺這個年頭做利物浦球迷認真辛苦，除咗要頂住敵對球迷嘅冷嘲熱諷，仲要隨時承受突如其來嘅失望，因為紅軍最鍾意喺人哋對佢有希望嗰陣輸波。不過，相比起為逃避失望而唔去期盼，或者為咗迷惑球迷而定個較低嘅目標，我欣賞羅渣士。
上星期，全隊紅軍由上到下都話要打入前4名，如今當然淪為被抽水嘅對象，就連唔少利迷以此自嘲，話羅渣士大想頭。睇番背景，利物浦喺對維拉賽前錄得3連勝，同埋差當時第4嘅愛華頓幾分；話要喺12月內上前4，都係合情合理。就算最後對維拉輸咗，換嚟失望，但每隊波都應該有自己嘅目標，衰咗一場啫，咪再嚟過囉，12月都仲有3場波畀佢努力。
以利物浦嘅實力，唔通羅渣士話今季目標係護級，最後排中游又有歐霸打，就話超額完成，好開心咁咩？既然定得目標，定要帶啲挑戰性；既然係挑戰，就唔係十拿九穩；如果係十拿九穩，嗰啲唔係叫目標，係本份，唔通巴塞同皇馬會話目標係入聯賽前4咩？
利物浦呢場輸咗畀維拉，要改善嘅嘢仲有好多，例如把握欠佳，蘇亞雷斯射門中目標的比率由初加盟嘅超過4成，跌到今季唔夠3成，而佢嘅入球效率就從來冇好過，嚟到紅軍後，每季都保持住超過10腳射門先入1球。另外，史達寧畀班英國傳媒捧到上天，但希望佢唔好自以為好勁，就不思進取，佢要留意吓自己今季射咗28腳都係入得1球。雖然紅軍大把嘢要改善，但利物浦球迷唔好妄自菲薄，郁啲就抽自己愛隊水，因為你哋至少仲有個有志氣嘅領隊。
文：咖喱