咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
周日放假留喺屋企冇嘢做，英超頭場熱刺對史雲斯戲碼又一般，所以轉台睇無記套《大太監》大結局，唔評論佢哋點扭歷史，歷史講宅心仁厚嘅東太后，反而係全片最奸一人，西太后同李蓮英為大清江山盡心盡力云云，不過多少都反映，忠義係中國基本道德中最為重要，西太后危急關頭，都係得番李蓮英呢位親信肯幫佢解圍。
哈利列納上任昆士柏流浪初期，即時傳出佢有意搵番一班親信過檔聯手護級，好似熱刺嘅柏加、迪科爾，以及史篤城嘅高治；雖然仲未成事，上周六幫佢攞到QPR第1場勝仗嘅，又係親信泰拉拔，兩人喺樸茨茅夫共事過，結果師徒合作，QPR今季終於第17場英超開齋。
有時唔到你唔服哈利列納，就算佢手腳幾唔乾淨，喺英超地位都真係差過費Sir少少，佢接手QPR至今起碼叫未輸過，加上中下游球隊輪流失分，形勢仲好亂，其實QPR距離成功護級線只差5分。之前批評過前朝嘅曉士，起用太多外籍僱傭兵，朴智星、施薩索拉斯、保辛華、格尼路等係就係身經百戰，獲獎無數，但正步向球員生涯晚期；見有個亞洲儍佬亂開支票，梗係收山前搵埋佢，基本對QPR嘅凝聚力麻麻，最好笑曉士仲要搵星仔做隊長，小弟唔係質疑星仔嘅能力，佢之前亦都做過南韓國家隊隊長，但要一個外國人主導社會，由一個南韓人領軍，我真係唔信好多球員會服佢。
哈利列納接手後，明顯加重番英籍元素，起碼佢哋生於斯長於斯，QPR真係降班，佢哋畀鄉親父老笑足一世喎！門將格連呢幾場復出把關，後防穩番好多，奧奴夏、安頓費迪南等都勝在夠鬥志，總好過一班外援啦。
文：牽牛