內地經濟工作會議剛結束，正當阿爺全力興建「經濟適用房」同「廉租房」解決失衡問題時，名經濟學家張五常就大唱反調，認為咁做係大錯特錯。長居內地嘅張五常，周日喺北京出席一個財經峯會，拋出呢個非一般經濟概念，佢話經適房同廉租房政策，只會令所有窮人住埋一齊，造成標籤效應，小朋友住喺窮人區，一定會俾同學仔睇唔起，仲話香港嘅經驗「屬於災難性」。
張五常又指嗰啲投訴樓價太高、冇樓住嘅人，主要唔係因為佢哋冇樓住，而係因為佢哋冇機會賺錢，所以要協助、補貼佢哋買樓咁話。
其實住公屋都唔一定會俾人標籤，香港好多政商名人，好似I.T（999）主席沈嘉偉、前任律政司司長黃仁龍等，都係住公屋出身。香港咁多人住公屋，唔知張五常幾時得閒返來香港，去公屋行個圈，體會吓公屋居民獅子山下嘅精神呢？