【本報訊】無綫首度以全民投票方式選舉的《萬千星輝頒獎典禮2012》昨晚揭盅，全港有1,542,922市民參與投票。曾兩度奪得視帝、現年48歲的黎耀祥，昨晚再下一城憑《大太監》再登視帝寶座，黎耀祥所得票數為114,947票。而現年33歲的楊怡則憑《名媛望族》封后，fans多的大熱林峯全晚慘食白果。至於被網民捧為神劇的《天與地》眾望所歸成為最佳劇集。
記者：楊潔雯 何慧斯 黃曉妍
無綫《萬千星輝頒獎典禮2012》昨晚假將軍澳電視廣播城舉行，今年視帝視后及最佳劇集一反傳統，以一人一票公投形式選出。無綫昨晚公佈參與投票人數達1,542,922。林峯和徐子珊一向多fans，視帝視后本被視為二人的囊中物，豈料昨晚結果卻完全出乎意料，先後於09年和10年奪視帝的黎耀祥，憑《大太監》力壓一眾對手第三度封帝，平了當年羅嘉良紀錄，而黎耀祥所得票數為114,947票。至於楊怡則憑《名媛望族》首度封后，其所獲票數110,795。
楊怡嗌謙仔儍瓜
首度封后的楊怡領獎時熱淚流不停，其男友羅仲謙都替她高興而眼濕濕，但她致謝辭逐一多謝伯樂，卻沒有羅仲謙份，她邊喊邊說：「我以為選情告急，多謝觀眾投我一票，呢十幾年好難行，我冇放棄。」楊怡最感激媽咪支持，她說：「無論我做乜嘢角色，媽咪都話我嘅戲最好睇，為我而驕傲。」楊怡也多謝當年汪明荃鼓勵她簽約無綫經理人。提到羅仲謙為楊怡喜極而泣，楊怡風騷說：「做乜鬼嘢，唔好喊儍瓜，等佢攞先喊。」
黎耀祥第三次成為視帝，他上台接受獎項時說：「我返咗無綫都十年，人生真係有幾多個十年，多謝TVB畀我一生人嘅經歷、一生成長同一生榮耀。」
被喻為無綫近年神級水準的《天與地》雖然收視不濟，但在網民熱烈支持下，以84,472票終成為本年度最佳劇集，由即將離職的監製戚其義和已離職的編審周旭明上台領獎。戚其義上台時搞笑說：「要鬧嘅唔知鬧晒未。」周旭明隨即說：「爭議性嘅嘢呢個騷唔講，除咗多謝。」
黎芷珊感激舊愛
林峯和徐子珊因fans眾多，料投票支持者眾，但最後齊齊大熱倒灶，林峯更全晚食白果，徐子珊則憑《雷霆掃毒》演毒后陳家碧獲我最喜愛的電視女角色，馬國明則憑《On Call 36小時》演張一健獲我最喜愛的電視男角色。徐子珊領獎時喊不停說：「我唔係最得人鍾意嘅人，呢個獎係公司同事投，我好開心同事撐我，工作環境得到支持，認同好重要。」馬國明說：「好多人覺得攞呢個獎等於冇得攞男主角，所以唔恨攞呢個獎，如果你哋唔恨，我每年都願意攞。」
最佳節目主持眾望所歸由《最佳男主角》主持黎芷珊奪得，黎芷珊上台領獎時一度哽咽多謝前度男友張達倫說：「要多謝一個人，佢係張達倫，佢畀咗好多鼓勵我，冇佢唔會有呢個節目，佢push咗我好多，我知我今年好好運，我想分一半畀你，我知你差啲運氣，畀心機呀。」場面感人。事後黎芷珊邊哭邊接受訪問，問可會與舊愛復合時，她斬釘截鐵說：「我諗冇啦，家我哋仲係好好朋友。」
大會昨增設五個傑出演員大獎，以示對資深藝人作鼓勵。得獎得包括錢嘉樂、許紹雄、陳錦鴻、李成昌和鄭裕玲。曾志偉頒獎予錢嘉樂時笑說：「佢非常受人尊重，但佢只係我條。」其後曾志偉又踢爆說：「佢話我今年乜都有，TVB嗰啲我唔希罕。」突然獲悉有獎攞的許紹雄上台領獎時搞笑說：「原來男人都有驚奇。我入行冇諗過攞獎，只係為攞人工。」擔任司儀的鄭裕玲亦驚喜地笑說：「今日真係又食又拎。」