香港社區組織協會搞嘅「住住先」攝影展噚日開幕，請到成日話好關注房屋問題嘅狼振英主禮。今次展覽主題係展示貧窮階層現時嘅居住環境，影嘅都係籠屋、板間房、棺材房。睇住一家幾口屈喺幾十呎嘅地方，相中人無奈又無助嘅表情，都好心酸。
三攝影師義務拍攝
社協話有近10萬貧民住喺呢啲不人道環境，其中患小兒麻痹症要坐輪椅嘅梁生，一家四口就住喺深水埗40呎板間房，等足六年都未上到公屋，申請體恤安置被拒，原因竟然係家住嘅大廈有，佢向狼英反映苦況時忍唔住喊。
狼英睇完展覽冇答記者問題就走咗。八方只好問吓社協主任何喜華，點睇狼英嘅狼穴越僭越大，但佢啲受助人就要蝸居。身為「梁粉」嘅佢梗係話係兩回事。講番個展覽，所有相片都係由陳木南、雷日昇同程詩詠三位專業攝影師，喺過去一年義務拍攝，展覽即日起至23號喺文化中心舉行。
