強國黑心「地溝油」流入香港，菲菲驚驚。最近收到WhatsApp，話包括美心、稻香（573）、大家樂（341）等過百間食肆都用「地溝油」，叫大家咪幫襯。嘩！咁咪總有一間喺左近？咪玩啦，幾間集團已分別澄清食油安全。
其實呢個訊息真係疑點重重，首先，如果呢幾間集團真係牽涉其中，仲唔做硬A1？第二，新加入名單食肆，大多係幾間大集團旗下。試諗如果連呢幾間集團都貪平用「地溝油」，冇理由名單入面得咁少小型食肆。
ICQ年代，久不久就會收到「如果唔將訊息發送畀N個人，你就會蒙上不幸」之類嘅訊息。當年菲菲年紀尚輕，都覺得信嗰個都低能，家陣資訊爆炸，更要求人要有批判思考。本住人人Share精神，分享好嘢本來冇問題，但如果訊息錯誤，而你又鼓勵人Share出去，隨時要負刑責。為免俾人借嚟過橋，分享前，停一停，諗一諗。
Fifi
本欄逢周二、四刊出